Sözaltı Sözlük - Azərbaycandilli Fikir Ensiklopediyası

+12062

Saat 5:15
Dünən kofein qəbulunun ağını çıxarmışam. Gecə səhərə gözümə yuxu getməyib. Pəncərənin qarşısındakı küçə lampası 3:48də söndü. O söndükdən sonra adını bilmədiyim ama cəh-cəhini çox bəyəndiyim quşlar oxumağa başladı. Havanın tam aydınlaşması isə 4:30lara təsadüf edir.
Mənim üçün uzun müddətdir Monoton olan həyatın sıradan bir günü başlayır artıq. Həftənin neçənci günüdür, ayın neçəsidir bəzən günlərlə xəbərim belə olmur. Qarşıma n qədər hədəflər düzmüşəm. Birini gerçəkləşdirmək üçün belə qılım qımıldamır. Özümə Söz verib təqvimə qeyd etdiyim günlərin bildirişi gəlir və heç biri tamamlanmayıb. Utanıram özüm özümdən. Birneçə ay əvvəlki halımdan daha yaxşı olmağı qırağa qoy, qat-qat geriyəm.
Aylar sonra ilk dəfə podcast açdım. Şəxsi inkişaf filan məlumat xarakterli söhbət tipli bir bölüm idi. Əvvəllər söhbətdə tövsiyə edilən, sitat gətirilən filmlərin ya kitabların heç olmaya 60-70%ni bilirdim. İndi söhbətə fransız qalmağın ən üst səviyyəsindəyəm. Oxumaq üçün başucuma qoyduğum kitabın üstü tozlanıb, indi fikir verdim. Bir qeyd dəftərçəm vardı balaca, hər gün heç olmasa kiçicik bir araşdırma edib başlığını və mahiyyətini bir neçə cümlə ilə, bəzən səhifələrcə yazırdım. Baxıram ən son yazdığım tarixdən buyana keçən vaxt atam demiş, bir igidin ömrüdü.
Təzə kitablar tapmışam. İxtisasımla əlaqəli, biraz marağında olduğum mövzularla bağlı, əskik hiss etdiyim tərəflərim və bunun kimi fərqli şeylər barədə. Əvvəlcə başladıqlarımı bitirsəmmi, yoxsa təzə səhifə açıb sıfırdan mı başlasam düşünürəm indi. Hə, yazar hazırda bunu düşünür. Təmizlik edərəm yəqin ki bu gün dib bucaq. Vaxtımın çoxu ona xərclənər. Axşam tərəfi də bəlkə öz cızma qara romanıma bir iki cümlə əlavə edərəm, bəlkə də neçə vaxtdı uzun uzadı yazıb hazırladığım, amma üst üstə qoysan on dənəsini axıra qədər izləmədiyim film siyahısından birini seçib baxaram. Gecə yatmadığım üçün gün ərzində oyaq qalmağa görə kofein dilənəcəm. Ama iradəli olmalıyam heç olmasa 48saat uzaq qalıb özümə gəlim.

Yazar hazırda düşünür:
İrəliləmək üçün qaldığın yerdən davam etməlisən, yoxsa ağ vərəqin baş ucundan mı başlayasan? Bir söz vardı, kimin dediyini unutmuşam: "əgər yarı yolda qoyacaqdınsa, niyə bura qədər gəlirdin" bunun kimi birşey idi. Digər tərəfdən isə, əgər tamamlanacaq qədər maraq cəlb edən birşey idisə, niyə yarı yolda qoyulacaq vəziyyət yarandı?

Quşun səsini qeyd etməyə çalışdım ama uğultulu şəhərin səs küyü və əsən meh səs yazısını bərbad hala saldı. Daha sakit bir günə qismət deyək.

Sözaltı bugün

S Ö Z A L T I